Talið að fleiri þúsund minkar gangi lausir

„Við fengum tilkynningu í morgun um að það hefði verið meint innbrot í minkabúi og fjölda dýra hefði verið sleppt,“ segir Þóra Jónasdóttir, yfirdýralæknir hjá Matvælastofnun, en bætir við að lögreglan hefur ekki enn staðfest hvort að innbrot hafi verið í raun og rannsakar málið.

Hún segist líta slíkt mjög alvarlegum augum en slíkar aðgerðir séu þess eðlis að valda fjölda dýra auknum þjáningum, meiðslum og dauða. Fleiri þúsund dýr voru á búinu og talið er að fleiri þúsund dýr hafi sloppið en nákvæm tala liggur ekki fyrir.

Í tilkynningu frá lögreglunni á höfuðborgarsvæðinu í morgun sagði að nokkur hundruð minkar hafi sloppið frá Dalsbúi.

„Þetta er stórslys fyrir villt fuglalíf sem er á viðkvæmum tíma. Það er mikið af ungum og fuglum þarna í kring á viðkvæmum tíma þannig að þetta er hreint stórslys fyrir villt fuglalíf í kring.“

Hlutverk Matvælastofnunar sé að fylgja málinu eftir í samvinnu við dýraeigendur og að kæra ef talið er að brotið hafi verið gegn lögum um velferð dýra.

„Þetta er skýrt brot á lögum um velferð dýra og veldur auknum þjáningum, meiðslum og dauða dýra. Við vörum alifuglabændur við því að alifuglar í nágrenni eru auðvitað í talsverðri hættu búnir af fjölda lausra minka og við vinnum náið með lögreglu til þess að ná utan um málið,“ segir Þóra.