Fimm særðust í skot­á­rás í banda­rískum há­skóla

Skotárásin átti sér stað við nemendahúsnæði háskólans. Staðfest hefur verið að einn hinna særðu sé yngri en átján ára og að einn hinna særðu sé nemandi við skólann.

Lögregla kom á staðinn klukkan 13:28 að staðartíma eða klukkan 17:28 að íslenskum tíma. Enn hefur enginn verið handtekinn í málinu en grunur leikur á að fleiri en einn hafi verið að verki. Sem stendur liggur enginn hinna fimm særðu undir grun heldur eru þeir taldir fórnarlömb skotárásarinnar.

Nemendur háskólans hafa, í sögulegu samhengi, flestir verið þeldökkir en skólinn var stofnaður á tíma þar sem aðskilnaður milli kynþátta ríkti enn innan menntastofnana í Bandaríkjunum. Skólinn er í dag opinn fyrir umsóknum nemenda, óháð kynþætti.

Til hafði staðið að kennsla hæfist í skólanum á mánudaginn eftir sumarleyfi. Ekki er vitað hvort að atburðurinn hafi áhrif á fyrirætlanir skólans. Rúmlega fimm þúsund nemendur sækja nám við háskólann sem er staðsettur um þrjátíu kílómetra norður af Richmond, höfuðborg Virginíuríkis Bandaríkjanna.