Rekstrarformið byggi á sniðgöngu kjara­samninga

Fram kemur í fréttatilkynningu frá félaginu að FÍA geri ekki athugasemd við að Icelandair leiti hagræðingar í rekstri en telji að skýringar stjórnenda á kaupunum standist ekki skoðun.

„Í maí „engin fækkun“ í ágúst „á eftir að koma í ljós““

„FÍA getur ekki byggt kjaraviðræður á forsendum sem breytt er einhliða á fjögurra mánaða fresti. Þau störf sem hér eru í hættu eru störf sem unnin hafa verið á forsendum gildandi kjarasamninga. FÍA mun ekki geta fallist á að lögum og reglum íslensks vinnumarkaðar sé ekki fylgt,“ segir í tilkynningunni.

Félagið segir upplýsingagjöf stjórnenda til starfsfólks ótraustvekjandi.

„Þegar viljayfirlýsing um kaupin var tilkynnt 1. apríl fylgdu henni engar upplýsingar um áhrif á starfsfólk á Íslandi. Í maí sagði forstjóri félagsins í fjölmiðlum að ekki stæði til að fækka starfsfólki hér á landi færu kaupin í gegn. Þegar kaupin voru svo frágengin 20. ágúst og forstjórinn var spurður hvort íslenskar áhafnir myndu manna þau leiguflug sem færast á maltneska leyfið var svarið: „Það á eftir að koma í ljós.“ Fortakslaus yfirlýsing í maí er þannig orðin óvissa í ágúst án þess að viðsemjendur, starfsfólk eða markaður hafi verið upplýst um hvað breyttist.“

FÍA segir Ísland aðila að fleiri loftferðasamningum en Malta og tvísköttunarsamningum sömuleiðis. 

„Samstæðan á Íslandi hefur sinnt leiguflugsverkefnum í öllum sjö heimsálfum með frábærum árangri á íslensku flugrekstrarleyfi. Hryggjarstykkið í þeim árangri hefur verið starfsfólk félagsins, ekki síst flugáhafnir. Hvar kreppir skórinn?“

Rekstrarformið sé sniðganga kjarasamninga

Icelandair hafi í viðræðunum hingað til lagt þunga áherslu á heimild til að leigja inn erlendar flugvélar ásamt áhöfnum og aukinn sveigjanleika í reglum um hvíldartíma og lengd fluga.

„Á sama tíma hefur félagið tryggt sér flugrekstrarleyfi utan íslensks vinnumarkaðsumhverfis. Í því samhengi er nærtækasta merking orðsins „sveigjanleiki“ sú að komast undan íslenskum kjarasamningum og eftirliti yfirvalda. FÍA telur að rekstrarformið byggi á félagslegu undirboði, sniðgöngu kjarasamninga og flutningi starfa úr landi. Ef sú niðurstaða er röng er einfalt fyrir stjórnendur að leggja fram þær forsendur og útreikninga sem sýna annað. Slík gögn hafa ekki verið lögð fram hvorki fyrir viðsemjendur, starfsfólk né hluthafa.“

Að lokum leggur FÍA fram eftirfarandi kröfur: