Fékk drauminn uppfylltan eftir MND greiningu

Arrow er 31 árs gamall Ástrali sem hefur leikið sem atvinnumaður í heimalandinu frá árinu 2016. Fyrst með Brisbane Broncos, svo Gold Coast Titans og loks með South Sydney.

Hann hafði leikið 98 leiki fyrir Sydney-liðið frá árinu 2021 þegar hann greindist með hreyfitaugungahrörnun, einnig þekkt sem MND (e. motor neuron disease), ALS eða Lou Gehrig-sjúkdómurinn.

Um er að ræða taugahrörnunarsjúkdóm sem einkennist af minnkandi styrk vöðva og rýrnun þeirra. Sjúkdómurinn er ólæknandi.

Forráðamenn South Sydney hafa stutt við bakið á Arrow frá greiningunni og hjálpuðu honum þá að uppfylla draum sinn um að ná 100 leikjum fyrir félagið. Til þurfti sérstaka undanþágu frá ástralska rúgbýsambandinu en Arrow fékk að spila fyrstu sekúndur síðustu tveggja leikja tímabilsins og ná þannig 100 leikjum.

Myndskeið af því þegar Arrow leiddi lið sitt til vallar í hundraðasta leiknum má sjá í spilaranum.

Stuðningsmenn liðsins sendu honum hlýjar kveðjur úr stúkunni, margir hverjir höfðu málað skiltu honum til stuðnings og þá söng skarinn You'll Never Walk Alone hástöfum.

Úr varð tilfinningarík stund fyrir Arrow sem sjá má að ofan.