Jón Dagur breyst úr floppi í stjörnu

Jón Dagur er á sínum stað í nýjasta landsliðshópi Íslands sem kynntur var í vikunni og ætti að mæta fullur sjálfstrausts á Laugardalsvöll þar sem Ísland mætir Eistlandi á laugardaginn eftir viku.

Hann hefur nefnilega unnið sér inn byrjunarliðssæti hjá Herthu Berlín, skorað og lagt upp, og átt sinn þátt í því að liðið hefur unnið alla sex leiki sína á keppnistímabilinu til þessa. Liðið trónir því á toppi þýsku 2. deildarinnar með fullt hús stiga.

Í þýska miðlinum BZ-Berlin síðasta föstudag segir að Jón Dagur hafi breyst „úr floppi í stjörnu“. Hann hafi bara skorað eitt mark í 33 leikjum á síðustu leiktíð, úr víti, og átt tvær stoðsendingar en sé þegar búinn að bæta það á þessari leiktíð með einu marki og þremur stoðsendingum. Hann sé í raun og veru að spila snilldarlega vel.

BZ-Berlin fékk annan Íslending sem klæddist treyju Herthu Berlín með svo miklum sóma á sínum tíma, Eyjólf Sverrisson, til að tala um Jón Dag sem Eyjólfur þekkir ansi vel.

„Jón er búinn að losa handbremsuna. Þessi frammistöðusprenging kemur mér ekki á óvart. Ég samgleðst Jóni, sem ég þjálfaði í fyrra starfi mínu sem landsliðsþjálfari U21 árs liðs Íslands. Hann er harðsnúinn víkingur sem vill alltaf vinna. Sannkallaður liðsmaður með mikinn karakter, baráttuhjarta og gríðarlega hlaupagetu. Dugnaður hans gerir hann einstakan. Frábær fyrirmynd, líka fyrir ungu leikmenn Herthu. Hann er virkilega góður leiðtogi,“ sagði Eyjólfur við BZ-Berlin.

Eyjólfur segir ljóst að tíminn hjá Brann, þar sem Jón Dagur lék undir stjórn Freys Alexanderssonar, hafi gert Jóni Degi gott.

„Jón þurfti smátíma til að aðlagast í Berlín. Ferskt upphaf í hálft ár í Noregi gerði honum gott því þar fékk hann meiri spiltíma og gat endurheimt sjálfstraustið. Hann gafst aldrei upp. Maður getur dottið en maður verður að standa upp aftur. Það sýnir hann. Ég vona að það haldi áfram að ganga svona vel hjá honum og Herthu svo við getum öll fagnað í lokin,“ sagði Eyjólfur.

Jón Dagur verður næst í eldlínunni annað kvöld þegar Hertha Berlín sækir Dresden heim, áður en hann kemur svo til móts við félaga sína í íslenska landsliðinu í næstu viku.