Vaxta­hækkunar­ferli lokið en langt í lækkun

Búist er við svipuðum hagvexti í ár og í fyrra en því er spáð að vöxturinn glæðist jafnt og þétt á spátímanum. 

„Í ár styðja utanríkisviðskipti við hagvöxtinn þar sem útflutningur vex hraðar en innflutningur. Á sama tíma vex einkaneysla hægar en áður var talið og fjármunamyndun stendur nánast í stað. Á næstu tveimur árum tekur hagvöxtur við sér á ný, studdur af auknum krafti í innlendri eftirspurn, viðsnúningi í íbúðafjárfestingu og fjölþættum útflutningsvexti, ekki síst í hugverkaiðnaði og landeldi,“ segir í þjóðhagsspánni. 

Verðbólga hafi enn og aftur reynst þrálátari en áður var spáð en aukinn slaki í hagkerfinu og hóflegri launahækkanir ættu þó að styðja við hjöðnun hennar. 

„Forsenduákvæði kjarasamninga virkjaðist í september og samkvæmt spánni munu þeir halda, en gert er ráð fyrir að launaliðurinn hækki lítillega á næsta ári umfram það sem núverandi samningar kveða á um. Atvinnuleysi ílengist fram á næsta ár en minnkar svo samhliða auknum umsvifum í hagkerfinu,“ segir í spánni.