„Ég gef ekki kost á mér í næsta leik“

Ísland var með öll völd langstærstan part í leik kvöldsins. Orri Steinn Óskarsson lagði upp mark á Andra Lucas Guðjohnsen snemma leiks og Andri lagði svo upp fyrir Orra fyrir hléið.

Guðlaugur Victor Pálsson innsiglaði svo 3-0 sigur með skallamarki eftir hornspyrnu Gylfa Þórs Sigurðssonar í síðari hálfleik. Arnar gat því glaðst eftir leik.

„Bara frábær dagur fyrir íslenskan fótbolta. Strákarnir í 20 ára liðinu áttu frábæran leik í dag. Við vildum ekki vera neinir eftirbátar og þetta var fagmannleg frammistaða. Það er smá þroskamerki í liðinu og við tókum það til okkar sem fór úrskeiðis í síðasta leik og vorum einhvern veginn bara þéttari og ekki eins barnalegir,“

„Mér fannst eins og þeir hefðu getað spilað í marga sólarhringa án þess að skora en að sama skapi hefðum við getað nýtt betur færin okkar betur í þessum leik, sérstaklega skyndisóknir,“ segir Arnar í samtali við Stefán Árna Pálsson í Lúxemborg eftir leik.

Menn reiðir inni í sér

Frammistaða Íslands var sannfærandi og það var allt annað að sjá orkustig liðsins frá leik við Eista sem lauk með jafntefli á laugardaginn var.

„Menn voru bara reiðir inni í sér eftir Eistlandsleikinn en samt með svalan haus. Það er stormur og við áttum það skilið, að fá gagnrýni. Við tökum það til okkar án þess þó að missa hausinn og vera litlir í sér og menn voru bara staðráðnir í því að bæta fyrir leikinn á Laugardalsvelli og það gera bara toppíþróttamenn,“ segir Arnar.

Það er náttúrulega búið að gusta svolítið um þig síðustu daga og þú hefur fengið persónulega gagnrýni frá sparkspekingum. Er mikill léttir akkúrat núna?

„Þetta er alveg yndislegt starf. Það er gagnrýni, það er bara flott og stundum á maður hana vel skilið, og stundum vill maður líka að það sé ekki alveg verið að taka strákana niður. Þú veist, Ísak og Hákon spiluðu á miðjunni á móti Frökkum í tvo leiki og voru stórkostlegir þar. Þannig að það er enginn að segja mér að þeir geti ekki spilað miðju líka á móti Eistlandi,“ segir Arnar og bætir við:

„Þetta eru strákarnir mínir og maður vill bara vernda þá fyrir gagnrýninni en ég skil hana mjög vel. Þetta er úrslitabransi og oft er það þannig að lið sem vinnur er bara besta lið í heimi og lið sem tapar er lélegasta lið í heimi.“

„En sannleikurinn er ekki alveg svona einfaldur en við héldum bara góðum haus. Við erum núna komnir á toppinn í riðlinum og það er bara okkar að sjá til þess að við verðum þar í lok nóvember,“ segir Arnar.

Meiddur og gefur ekki kost á sér

Í lok viðtals skaut Stefán Árni því inn að Arnar hefði meiðst í upphitun fyrir leik og tognað aftan í læri.

„Já, ég var að reyna einhverjar gamlar kúnstir og þarna gleymdi ég því að ég er 53 ára gamall og ég tognaði bara. Þetta er ekkert flóknara en það, þannig að ég gef ekki kost á mér í næsta leik,“ segir Arnar og brosir.

Viðtalið má sjá í spilaranum.