Chelsea fylgist með 16 ára brasilískum varnar­manni

Arsenal og Manchester City eru einnig sögð hafa augastað á hinum unga leikmanni.

Sales hefur þegar leikið einn landsleik fyrir Brasilíu U18 ára og komið við sögu í 17 leikjum með U20 ára liði Vasco da Gama. Hann er jafnframt í hópi leikmanna sem koma til greina í brasilíska U17 ára landsliðið fyrir HM sem hefst í nóvember.

Samkvæmt miðlum erlendis hefur eitt félag þegar lagt fram tilboð upp á tíu milljónir evra í Sales en því verið hafnað. Þrátt fyrir áhugann er ekki mögulegt fyrir Sales að ganga til liðs við enskt félag á næstunni vegna reglna FIFA um félagaskipti leikmanna undir 18 ára aldri.

Í fyrsta lagi gæti hann farið til félags í ensku úrvalsdeildinni í janúar 2028.

Chelsea hefur á undanförnum árum lagt mikla áherslu á að fá unga leikmenn frá Suður-Ameríku. Félagið hefur meðal annars sótt leikmenn frá Brasilíu og öðrum löndum álfunnar og virðist Sales nú vera kominn á radar félagsins.