Líkir Dallas Cowboys við ræningjana tvo í Home Alone

Einn þeirra sem eru duglegir að fjalla um Kúrekana frá Dallas er Colin Cowherd.

Hann kom með svolítið sérstaka samlíkingu eftir síðasta tapleik liðsins. Dallas tapaði óvænt 30-33 á heimavelli á móti Arizona Cardinals um helgina og hefur aðeins unnið 3 af 8 leikjum tímabilsins.

Í nýjustu ræðu sinni um Kúrekana líkti Cowherd liðinu við ræningjana í Home Alone. Það muna eflaust allir eftir þeim Harry og Marv, sem leiknir voru af Joe Pesci og Daniel Stern, og þeim hrakförum sem þeir lentu í.

„Cowboys-liðið er orðið eins og ræningjarnir tveir í Home Alone. Þeir eru að detta niður stiga og detta um allt sem á vegi þeirra verður,“ sagði Colin Cowherd.

Cowherd segir þetta verða það versta í fimm ár hjá Dallas Cowboys og það þrátt fyrir frekar auðvelda leikjadagskrá.

„Cowboys voru allavega á heimavelli um helgina en ræningjarnir voru það ekki. Þetta er verst þjálfaða liðið í allri NFL-deildinni og það er langt í þann næstversta,“ sagði Cowherd.