Ef einhver hélt að botninum hafi verið náð strax í fyrsta leik á HM í Katar þá kom annað í ljós í kvöld. Eftir að strákarnir sýndu góðan stíganda í leikjum sínum eftir tapið pínlega gegn Svíum varð algjört hrun í þeirra leik gegn Tékkum í kvöld. Lokatölur, 36-25.
Tékkland gaf tóninn strax í upphafi og leiddi frá fyrstu mínútu. Tékkarnir, sem höfðu tapað öllum leikjum sínum í keppninni til þessa, skoruðu 21 mark í fyrri hálfleik gegn arfaslöku íslensku liði.
Þeir gerðu nóg til að landa sigrinum í síðari hálfleik og þrátt fyrir að strákarnir reyndu hvað sem þeir gátu til að koma sér aftur inn í leikinn þá voru þeir einfaldlega að spila of illa til þess.
Ég ætla ekki að detta í þann forapytt að saka leikmenn íslenska landsliðsins um andleysi eða uppgjöf. Það er ekki í þeirra eðli og var heldur ekki að sjá á þeim í kvöld. Þeir spiluðu einfaldlega illa og var þetta auðveldlega versti leikur íslensks handboltaliðs á stórmóti í langan, langan tíma.
Aron Pálmarsson fékk högg í andlitið á 24. mínútu og þar með höggið sem margir óttuðust að væri væntanlegt. Aron, sem kinnbeinsbrotnaði skömmu fyrir mót, kom ekki einu sinni á bekk íslenska liðsins í síðari hálfleik.
Það er ekki hægt að hrósa neinum fyrir góða frammistöðu í gær. Því miður. Lykilmenn klikkuðu alfarið og það er sárast. Þeir sem komu inn á höfðu ekki kraftinn til að vinna upp forskotið sem Tékkar unnu sér inn í fyrri hálfleik. Það var langur vegur frá því.
Sóknarleikur Íslands var mjög slakur í kvöld og tékkneska vörnin átti í engum vandræðum með hann. Að sama skapi léku þeir sér að því að skora hvert markið á fætur öðru og þá er ekki að spyrja að niðurstöðunni.
Ísland mætir Egyptalandi á laugardag sem eru með svo mikinn stuðning í Doha að þeir gætu allt eins verið á heimavelli. Ekkert annað en sigur dugir til að tryggja Íslandi sæti í 16-liða úrslitunum. Jafntefli eða tap þýðir að strákarnir þurfa að verja sínum síðustu dögum hér í Doha í hinum skelfilega Forsetabikar.
Fyrri hálfleikur var hreinasta, hreinasta hörmung. Ekkert gekk upp. Ekki nokkur skapaður hlutur. Á meðan gengu Tékkar á lagið og spiluðu íslenska liðið sundur og saman - ítrekað.
Aron, Alexander og Snorri Steinn neyddust til að taka þvinguð skot hvað eftir annað eftir þunglamalegar og hugmyndasnauðar sóknaraðgerðir og Petr Stochl fór í gang í marki Tékkanna. Hann verði hvert skotið á fætur öðru.
Þetta var ekki í fyrsta sinn sem sóknarleikur Íslands hefur lent í vandræðum í þessari keppni. Áður voru það skotin sem klikkuðu en strákarnir náðu þó að spila sig í færi. Nú var það ekki einu sinni uppi á teningnum. Þessi sóknarleikur líktist á engan hátt þeim sem strákarnir höfðu spilað til þessa á mótinu.
Sama má segja um varnarleikinn og markvörsluna. Hina margrómuðu íslensku geðveiki skorti frá fyrstu mínútu og skyttur Tékkana gengu ítrekað á lagið. Skipti engu þó svo að Aron Rafn hafi komið inn á fyrir Björgvin Pál eftir aðeins sex mínútna leik. Markvarslan var allt of lítil.
Það kom örstuttur kafli seint í fyrri hálfleiknum þar sem hlutirnir gengu þolanlega hjá strákunum. En hann var allt of stuttur og Tékkarnir rúlluðu yfir okkar menn með því að breyta stöðunni úr 15-9 í 21-11 á síðustu níu mínútum hálfleiksins.
Aron Pálmarsson fékk þungt högg í andlitið frá Ondrej Zdrahala eftir tæplega 24 mínútna leik. Aron var viðkvæmur eins og vitað var eftir að hann kinnbeinsbrotnaði eftir líkamsárás á milli jóla og nýárs. Hann kom ekki meira við sögu í fyrri hálfleik.
Eini maðurinn sem sýndi eitthvað lífsmark eftir að hann kom inn á var Stefán Rafn Sigurmannsson. Hann skoraði einu tvö mörk Íslands á síðustu níu mínútum hálfleiksins en allir aðrir voru langt, langt frá sínu besta.
Stochl var með 61 prósenta hlutfallsmarkvörslu í fyrri hálfleik og Filip Jicha skoraði átta mörk úr níu skotum. Íslensku markverðirnir vörðu sjö skot í fyrri hálfleik og skotnýting liðsins var aðeins 37 prósent. Aron Pálmarsson var með eitt mark úr sjö skotum.
Tékkland þurfti aðeins að halda haus í síðari hálfleik. Þeir voru tíu mörkum yfir og Aron Pálmarsson, besti maður Íslands, var hvergi sjáanlegur á bekk íslenska liðsins. Hann kom aldrei til baka eftir að leikmenn gengu inn í búningsklefa að loknum fyrri hálfleik.
Það var þó meiri ákefð í íslensku vörninni og Björgvin Páll varði nokkur skot í upphafi síðari hálfleiksins. En Tékkarnir náðu að hanga á boltanum og skiluðu inn sínum mörkum.
Í hvert sinn sem strákarnir sýndu einhverja tilburði þess að ætla að koma til baka áttu Tékkarnir svör. Það var sama hvaða spil Aron Kristjánsson lagði á borðið - ný vörn, nýir leikmenn, ný kerfi - ef eitthvað gekk upp þá svöruðu Tékkarnir jafn harðan.
Tíminn vann með Tékkunum og þeir héldu okkar mönnum í öruggri fjarlægð allan leikinn. Niðurstaðan sorglegt tap í leik sem strákarnir þurftu að vinna. Nú þurfa þeir að vinna Egyptaland á laugardag - að öðrum kosti fara þeir í Forsetabikarinn eftir helgi.

