Líklega ekki senditæki

Bungan sem sást á bakinu á George Bush Bandaríkjaforseta í kappræðum á dögunum er að líkindum tilkomin vegna lélegs saumaskapar að mati skraddara á Skólavörðustíg. Þeir sem þekkja til hlustunarbúnaðar telja afar ólíklegt að bungan sé senditæki. Bungan sem sést á baki forsetans í kappræðum við John Kerry á dögunum hefur orðið tilefni vangaveltna víða. Telja margir víst að Bush hafi tekið við leiðbeiningum frá aðstoðarmönnum sínum á meðan á kappræðunum stóð. Eyþór Árnason, sviðstjóri á Stöð 2 sem sér um að búa fólk út fyrir útsendingar, finnst staðsetning tækisins - sé þetta tæki - mjög undarleg. Venjulega sé senditæki sett í buxnastreng manna eða einfaldlega í vasa þeirra.   Indriði Guðmundsson, klæðskeri á Skólavörðustíg, telur aðra skýringu á bungunni. Hann segir líklegast að þarna sé lélegum saumaskap um að kenna. Klæðskeri Bush sé líka orðin gamall, auk þess sem hann hafi jafnvel verið timbraður morguninn sem hann saumaði fötin. En þá er enn óútskýrt hvað var uppi í eyranu á Bush. Kannski saltkringla.