Stefán dæmdur í 3 ára fangelsi

Héraðsdómur Reykjavíkur dæmdi í dag Stefán Loga Sívarsson, annan „Skeljagrandabróðurinn“, í þriggja ára fangelsi fyrir mjög alvarlega líkamsárás sem hefði getað leitt til dauða. Milta mannsins rifnaði svo hann hlaut innvortis blæðingu. Stefán Logi hefur hlotið fjóra dóma fyrir líkamsárásir. Síðast var hann dæmdur í fyrra í tveggja ára fangelsi, ásamt bróður sínum, fyrir lífshættulega líkamsárás við Skeljagranda í Reykjavík. Þá sagði verjandi hans að atvikið hafi orðið til þess að viðhorf bræðranna hafi breyst til batnaðar og þeir hafi farið í nám í fangelsinu og vímuefnameðferð. Stefán Logi fékk reynslulausn í nóvember og rauf því skilorð nú. Samkvæmt sálfræðirannsókn á Stefán Logi við ýmiss konar félagsleg og persónuleg vandamál að stríða, sem að langmestu leyti má rekja til fíkniefnaneyslu og mjög erfiðra uppeldisskilyrða.