170 milljónir fram úr áætlun

R-listinn hefur engar haldbærar skýringar á því af hverju kostnaður við landnámsskálann við Aðalstræti hefur farið að minnsta kosti 170 milljónir króna fram úr kostnaðaráætlun. Þetta segir oddviti sjálfstæðismanna í Reykjavíkurborg.  Vilhjálmur Vilhjálmsson, oddviti Sjálfstæðisflokks, segir kostnað við landnámsskálann við Aðalstræti vera orðinn 620 milljónir króna. Í bréfi borgarstjóra þann 3. júlí árið 2003 til menntamálaráðherra hafi komið fram að áætlaður heildarkostnaður verkefnisins hafi verið 357 milljónir. Í sama bréfi hafi þó talan 446 milljónir króna komið út sem samtala allra liða. Kostnaður hafi því farið frá 170 til 263 milljónum fram úr áætlun. Sjálfstæðismenn báðu á sínum tíma innri endurskoðanda um að fara yfir málið og í framhaldi af niðurstöðu hans kom þessi umræða upp að sögn Vilhjálms. Þetta sé hins vegar orðinn hlutur og ekki verði aftur snúið úr þessu.