Síðbúið páskahret

Mikil snjókoma helltist yfir landsmenn í gær og kom mörgum í opna skjöldu. Veðurstofan hafði þó spáð fyrir um snjókomuna en samkvæmt upplýsingum hennar hefur þó ekki snjóað að ráði síðan um miðjan febrúar. Örlítil slydda var þó fyrir nokkrum dögum og í lok febrúar en ekkert þessu líkt. Það má því segja að þetta síðbúna páskahret hafi komið eins og þruma úr heiðskýru lofti fyrir þá sem orðnir voru bjartsýnir um að vorið væri á næsta leiti. Óþarfi er þó að fara að taka fram snjóbuxur og gönguskíði því ekki er búist við að snjórinn haldist í neinn tíma. Það ætti því að birta til í næstu viku og hver veit nema vorið sé þá bara á næsta leiti.