Met í kaupum á erlendum bréfum

Kaup á erlendum verðbréfum hafa ekki verið meiri en í janúar síðastliðnum síðan kerfisbundið var farið að safna upplýsingum um slík kaup árið 1994. Með verðbréfum er átt við hvers konar framseljanleg skuldabréf og hlutabréf og aðrar kröfur sem hafa ígildi peninga, svo sem víxla.

Samkvæmt tölum Seðlabankans námu nettókaup innlendra fjárfesta í erlendum bréfum í janúar 33,5 milljörðum króna. Í janúar í fyrra nam upphæðin tæpum 1,5 milljörðum króna. Ásókn innlendra fjárfesta í erlend verðbréf hefur stigmagnast frá árinu 2001, var mjög mikil árið 2005 og nú er spurning hvort álíka sókn verði á árinu 2006, segir tölfræðisvið Seðlabankans.

Edda Rós Karlsdóttir, forstöðumaður greiningardeildar Landsbankans, segir erfitt að spá fyrir um hvort ásókn í erlend verðbréf verði jafnmikil áfram. Það fer eftir þróun krónunnar og verðþróun hér heima, segir hún, en miklu getur munað milli mánaða á kaupum í erlendum bréfum. Okkur sýnist reyndar líka að mikil velta sé með verðtryggð skuldabréf og að stórir fjárfestar séu að kaupa meira í þeim en verið hefur. En þegar svo miklar sveiflur eru milli mánaða er varhugavert að draga of miklar ályktanir af mánaðartölum, þótt auðvitað sé gaman að rýna í mettölur.

Aukinni ásókn í erlend bréf veldur sterk króna og tiltölulega hátt verð á verðbréfum hér heima segir Edda Rós. Kaupmáttur okkar er mikill í útlöndum meðan krónan er svona sterk. Síðan er eins og aðeins sé komin óvissa í kerfið og þá bregðast menn kannski svona við, segir hún og bætir við að þessi þróun verðbréfakaupa sé mjög góð. Æskilegt er að menn dreifi áhættunni og gott fyrir svona skuldsetta þjóð að menn eigi eignir erlendis sem skili okkur tekjum í framtíðinni, þannig að þetta er bara hið besta mál.

Í mati greiningardeildar Lands­bankans segir að langstærstan hluta kaupanna megi rekja til hlutabréfakaupa í einstaka fyrirtækjum, en þau hafi í janúar numið 28,2 milljörðum króna. Kaup á erlendum hlutabréfum hafa aukist gífurlega á síðustu misserum, segir þar og bent á að í fyrra hafi þau numið 71,2 milljörðum króna, fimmfalt hærri upphæð en árið 2004.