Óhress með Messi

Jose Mourinho var ekki par hrifinn af rauða spjaldinu sem leikmaður hans Asier del Horno fékk að líta í leiknum við Barcelona í Meistaradeildinni í gær og þótti Lionel Messi sýna full leikræna tilburði þegar atvikið átti sér stað.

"Mér fannst þetta nú alls ekki vera rautt spjald og ég get lítið sagt um leikinn þar sem við vorum einum færri allan tímann. Þetta var góður leikur þegar jafnt var í liðunum, en ég get lítið annað sagt en að ég er stoltur af mínum mönnum fyrir baráttu þeirra. Lionel Messi er frábær leikmaður, en hann er góður í fleiru en fótbolta," sagði Mourinho og var eflaust að meina að strákurinn ætti framtíð fyrir sér í leiklistinni.