King framlengir við Tottenham

Fyrirliði Tottenham Hotspur, varnarmaðurinn Ledley King, skrifaði í dag undir nýjan samning við félagið sem gildir í fjögur ár. Núverandi samningur hans hefði runnið út á næsta ári, en hann hefur nú ákveðið að vera áfram hjá félaginu og sagði annað aldrei hafa komið til greina í sínum augum.

"Það hefur tekið mikinn tíma að ganga frá samningnum, en í mínum augum kom aldrei annað til greina en að vera áfram. Félagið er á góðri leið og ég hlakka til að bera fyrirliðabandið inn í nýja og spennandi tíma," sagði King sem er reyndar meiddur og kemur ekki við sögu í lokaleiknum mikilvæga þar sem væntanlega ræðst hvort liðið kemst í fyrsta sinn í sögunni í meistaradeildina.