Hjálmar vill standa í brúnni

Hjálmar Árnason, þingmaður Framsóknarflokksins, segir engan eiga neitt í pólitík og því líti hann ekki svo á að hann sé að fara gegn Guðna í prófkjöri framsóknarmanna í Suðurkjördæmi. Hann sé búinn að vera fyrsti stýrimaður í tólf ár og vilji nú athuga hvort að fyrsti stýrimaður fái ekki að fara eins og einn róður.

Hjálmar hefur ákveðið að bjóða sig fram í fyrsta sætið í prófkjöri Framsóknarflokksins í Suðurkjördæmi sem fram fer 20. janúar næstkomandi. Guðni Ágústsson, landbúnaðarráðherra og varaformaður Framsóknarflokksins, hefur skipað efsta sæti á lista Framsóknarflokksins í kjördæminu.

Hjálmar segist hafa verið hvattur til að bjóða sig fram víða í kjördæminu, sér í lagi af Suðurnesjamönnum sem telja árangur sinn ekki sem skyldi í prófkjörum undanfarið. Í morgun skoruðu stuðningsmenn Hjálmar á hann að bjóða sig fram og ákvað hann að svara kallinu. Hjálmar telur að framboð sitt muni hleypa lífi í flokksstarfið og býst við spennandi og heiðarlegri kosningabaráttu.