Klipptur úr bílflaki

Harður árekstur varð norðan við Munaðarnes við bæinn Grafarkot rétt fyrir klukkan fjögur í gær þegar jeppi og flutningabifreið skullu saman. Beita þurfti klippum til þess að ná ökumanni jeppans, sem var einn á ferð, út úr bifreiðinni.

Ökumaður jeppans var fluttur á slysadeild Landspítalans Háskólasjúkrahús með þyrlu. Í flutningabifreiðinni var einn farþegi ásamt ökumanni og sluppu báðir ómeiddir. Björgunarsveitarmenn aðstoðuðu vegfarendur á Holtavörðuheiði, þar sem var blindbylur í gær. Fimmtíu umferðaróhöpp urðu í Reykjavík vegna slæmrar færðar en enginn slasaðist.