Detroit og Houston í góðum málum

Tveir leikir fóru fram í úrslitakeppni NBA deildarinnar í körfubolta í nótt. Detroit kom sér í 2-0 gegn Orlando með nokkuð auðveldum 98-90 sigri á heimavelli og Houston komst sömuleiðis í 2-0 gegn Utah með 98-90 sigri í leik tvö.

Richard Hamilton var stigahæstur hjá Detroit með 22 stig, Chauncey Billups skoraði 21 stig, Tayshaun Prince 18 og Rasheed Wallace 17 stig og hirti 11 fráköst. Það var einmitt Wallace sem setti tóninn í leiknum í gær þegar hann varði skot frá Dwight Howard í fyrstu sókninni í leiknum og setti þrist á hinum endanum. Hedo Turkoglu skoraði 22 stig fyrir Orlando og Grant Hill 21 stig.

Annar leikur Houston og Utah þróaðist mjög svipað og sá fyrsti þar sem gestirnir höfðu frumkvæðið fram í síðari hálfleik, en heimamenn í Houston tóku öll völd í þeim síðari. Tracy McGrady var stigahæstur í liði Houston emð 31 stig, en skoraði 12 þeirra á vítalínunni og hitti aðeins úr 9 af 29 skotum sínum utan af velli - þar af 1 af 8 þristum. Yao Ming skoraði 27 stig fyrir Houston, sem er komið í góð mál í einvíginu þó næstu tveir leikir fari fram í Utah.

Carlos Boozer fór hamförum í liði Utah og skoraði 41 stig, hirti 12 fráköst og gaf 6 stoðsendingar. Charles Barkley hafði gagnrýnt Boozer sérstaklega í sjónvarpsþætti eftir fyrsta leikinn, þar sem Boozer hitti illa og skoraði aðeins 11 stig. Hann bætti sannarlega úr því í öðrum leiknum í gær og var með 15 stig í fyrsta leikhlutanum einum saman. Leikurinn var sýndur beint á NBA TV í nótt.

Hér fyrir neðan má sjá næstu leiki sem sýndir verða beint á NBA TV:

Þriðjudagur 24. apríl Toronto - New Jersey leikur 2 klukkan 23:00

Miðvikudagur 25. apríl Dallas - Golden State leikur 2 klukkan 01:30

Fimmtudagur 26. apríl Utah - Houston leikur 3 klukkan 01:00

Föstudagur 27. apríl New Jersey - Toronto leikur 3 klukkan 23:00

Laugardagur 28. apríl Orlando - Detroit l eikur 4 klukkan 19:00

Sunnudagur 29. apríl New Jersey - Toronto leikur 4 klukkan 23:30