Netárásir enn algengar

Þrátt fyrir að eðli netárása hafi breyst hefur þeim síst af öllu fækkað.

Á vef breska ríkissjónvarpsins BBC eru netárásir gerðar að umtalsefni. Netárásir eru þegar tölvuþrjótar koma sér upp svokölluðum bot-tölvum, sem venjulega eru stolnar, og hóta gegnum þær að yfirfylla tölvukerfi fyrirtækja af draslpósti og gagnslausum upplýsingum þannig að þau hrynji.

Eina leiðin fyrir fyrirtækin að forðast árásina er að borga þrjótunum þá upphæð sem farið er fram á. Hrun getur verið dýrkeypt og því er ekki óalgengt að gengið sé að kröfum tölvuþrjóta. Þeim er borgað og svo er beðið og vonað að ekkert verði af árásinni.

Slíkum árásum hefur fækkað þar sem þær eru erfiðar og áhættusamar en tölvuþrjótarnir hafa fundið nýja leið til að nýta hæfileika sína. Nú virðist það færast í vöxt að fyrirtæki fái tölvuþrjóta til að framkvæma árásir á samkeppnisaðila sína. Liggi vefsíða annarra niðri gefur það óneitanlega forskot í hörðum viðskiptaheimi.

Fátt virðist geta komið í veg fyrir þessar árásir. Eftir því sem öryggiskerfi verða öflugri, þeim mun duglegri verða þrjótarnir að finna leiðir til að brjóta þau á bak aftur.