Björgunarsveit á Barðaströnd og björgunarskip frá Rifi á Snæfellsnesi voru kölluð út laust fyrir miðnætti, til leitar að báti á Breiðafirði. Báturinn datt út úr sjálfvirka tilkynningaskyldukerfinu og svaraði ekki kalli. Fyrirhugað var að senda þyrlu til leitar í birtingu, en björgunarsveitarmenn fundu bátinn skömmu síðar.
Báturinn var við land og ekkert amaði að skipverjunum tveim. Báturinn var í lagi, en mönnunum hafði láðst að láta vita að þeir ætluðu í land.
