iTunes-lög geyma persónuupplýsingar

Upp hefur komist að allar iTunes-skrár innihalda upplýsingar um hver keypti skrána, líka þær sem ekki eru varðar af afritunarlás. Nýlega byrjaði iTunes að selja tónlistarskrár án afritunarlása. Framtakið hefur mælst vel fyrir þrátt fyrir að lögin séu dýrari á þessu formi.

Þrátt fyrir að lásarnir séu horfnir notar Apple svokallað Fairplay-forrit sem takmarkar notkunarmöguleika iTunes-laga. Forritið hefur reynst lítil hindrun fyrir fjölfaldara því auðvelt er að komast framhjá því. Einfaldast er að brenna lögin á disk, setja þau aftur inn í tölvuna og breyta formati þeirra.

Nú hefur komið í ljós að iTunesskrárnar geyma alltaf upplýsingar um upprunalegan kaupanda, nafn hans, kaupdag og netfang. Apple hefur enn ekki svarað af hverju upplýsingarnar eru þarna en flestir eru á því að um enn eitt formið af afritunarvörn sé að ræða, enda gera upplýsingarnar Apple mun auðveldara um að rekja ólögleg afrit netinu til upprunalegra eiganda.

Sérfræðingar telja að nú sé einungis tímaspursmál hvenær búið verði til forrit sem eyði þessum upplýsingum úr tónlistarskránum, sé það ekki til nú þegar. Þangað til halda margir að sér höndum.