37 ára bið Cleveland á enda

Gamall draumur stuðningsmanna Cleveland Cavaliers verður að veruleika í nótt þegar liðið spilar sinn fyrsta leik á heimavelli í lokaúrslitum NBA deildarinnar í 37 ára sögu félagsins. Ljóst er að heimamenn þurfa á einhverju sérstöku að halda í kvöld þegar þeir taka á móti San Antonio í þriðja leik liðanna, enda undir 2-0 í einvíginu. Leikurinn í nótt verður sýndur beint á Sýn klukkan eitt eftir miðnætti.

Einvígi liðanna hefur verið leikur kattarins að músinni til þessa og sigraði San Antonio með fádæma yfirburðum í fyrstu tveimur leikjunum á heimavelli sínum. Næstu þrír leikir - ef með þarf - fara nú fram á heimavelli Cleveland og það lið sem fyrr vinnur fjóra leiki hampar titlinum.

San Antonio-liðið er ekki ókunnugt því að spila í lokaúrslitum og hefur alltaf farið með sigur af hólmi ef það hefur komist alla leið í úrslitin - árin 1999, 2003 og 2005. Talað er um að lið San Antonio sé illviðráðanlegt í úrslitakeppni ef aðeins tveir af þeim Tim Duncan, Manu Ginobili og Tony Parker spila vel, en þeir hafa allir þrír átt prýðisgóða leiki í tveimur fyrstu leikjunum - enda voru þeir ekki sérlega spennandi. Þá hefur varnarleikur liðsins verið agaður og sterkur - og þegar svo er, er ekkert lið í deildinni sem stenst San Antonio snúning.

Leikmenn Cleveland eru í úrslitum nokkuð óvænt og þar á bæ fer lítið fyrir reynslumiklum leikmönnum. Varnarleikur San Antonio hefur verið sérsniðinn að því að stöðva LeBron James og það hefur tekist mjög vel til þessa. Aukaleikarar Cleveland hafa ekki náð að standa undir væntingum og það er einna helst nýliðinn Daniel Gibson sem sýnt hefur kjark og þor í sóknarleiknum.

Þetta er oft fljótt að breytast þegar lið koma aftur á heimavöllinn sinn og skemmst er að minnast einvígis Cleveland gegn Detroit fyrir hálfum mánuði, þar sem Cleveland tapaði fyrstu leikjunum á útivelli en fór samt áfram. Ljóst er að heimamenn þurfa á öllu sínu að halda til að ná sigri gegn einbeittu og vel stilltu liði gestanna í kvöld og vonandi tekst það svo áhorfendur Sýnar og NBA áhugamenn á Íslandi fái nú spennandi einvígi í lokaúrslitunum.