Gríðarleg umferð til höfuðborgarinnar í gær

Gríðarlegar bílalestir mynduðust á Suðurlandsvegi og Vesturlandsvegi í átt til höfuðborgarsvæðisins undir kvöld í gær og fór ekki að draga úr umferð fyrr en á tíunda tímanum í gærkvöldi. Um tíma var samfelld bílalest frá Reykjavík alveg upp að Grundartanga og var gripið til þess ráðs að hleypa umferð á Hvalfjarðargöng í hollum svo vegfarendur þyrftu ekki að dvelja lengi í menguninni þar.

Þá náði bílalestin á Suðurlandsvegi alveg upp á Hellsiheiði og voru ökumenn allt að klukkustund þaðan til Reykjavíkur. Eitt umferðarslys varð á Biskupstungnabraut og annað á Reykjanesbraut síðdegis, en engin slasaðist alvarlega. Þetta er einhver mesta umferð á Suður- og Vesturlandsvegi til þessa og lengdi það lestirnar verulega hversu margir bílar drógu aftanívagna af ýmsum gerðum.