Sérsveitarmenn yfirbuguðu sextán ára pilt

Sérsveitarmenn lögreglunnar í Reykjavík voru sendir á vettvang til að yfirbuga sextán ára pilt sem ógnaði heimilisfólki sínu með hnífi í heimahúsi í Reykjavík á tólfta tímanum í gærkvöldi. Þegar þeir komu á staðinn var engu tauti komið við piltinn, sem gekk berserksgang og gripu lögreglumenn þá til táragass, til að yfirbuga hann.

Eftir það var hann fluttur á slysadeild þar sem úðinn var hreinsaður úr augum hans og síðan var hann fluttur í fangageymslur. Mál hans heyrir undir barnaverndaryfirvöld en þetta mun ekki vera fyrsta brot hans.