Nakin vændiskona í hásæti Danadrottningar

Dönsk vændiskona komst með einhverjum furðulegum hætti inn í hásætissalinn í Kristjánsborgarhöll. Þar svipti hún sig klæðum, stillti upp myndavél og tók 29 mynda syrpu af sjálfri sér. Meðal annars tók hún myndir af sér í hásæti Margrétar Danadrottningar. Og þar sem hún sat klofvega á sætisörmunum á hásæti drottningarinnar og Hinriks prins.

Myndasyrpa vændiskonunnar mun birtast í næsta hefti tímaritsins Se og Hör. Tímaritið hefur látið sérfræðinga skoða myndirnar og þeir segja að þær séu ófalsaðar. Málið hefur valdið miklu fjaðrafoki í Danmörku. Ekki síst hjá öryggisvörðum konungsfjölskyldunnar.

Enginn getur ímyndað sér hvernig konan komst inn í hásætissalinn og athafnað sig þar í lengri tíma. Og svo bara gengið út án þess að nokkur hefði hugmynd um. Sjálf segir hún að það sé atvinnuleyndarmál. Víst er að málið verður rannsakað. Og talið er líklegt að drottningin og Hinrik prins muni láta strjúka af sætisörmum hásæta sinna áður en þau setjast þar aftur.