Ólafur: Pétur kemur til greina

„Pétur Pétursson er einn þeirra sem koma til greina,“ sagði Ólafur Jóhannesson, nýráðinn landsliðsþjálfari í knattspyrnu í samtali við Vísi.

Um er að ræða stöðu aðstoðarlandsliðsþjálfara en Ólafur segir að gengi verði endanlega frá ráðningunni á morgun.

Ólafur vildi ekki segja hverjir koma fleiri til greina en samkvæmt heimildum Vísis eru það Ólafur Kristjánsson, þjálfari Breiðabliks, eða Leifur Garðarsson, þjálfari Fylkis.

Pétur er núverandi þjálfari 2. flokks Breiðabliks en þjálfaði síðast KR í meistaraflokki karla árin 2000 og 2001. Liðið varð meistari fyrra árið en hann hætti svo um mitt næsta sumar.