NBA í nótt: Bosh leiddi Toronto til sigurs

Chris Bosh sneri aftur í lið Toronto í nótt eftir fimm leikja fjarveru vegna meiðsla. Hann leiddi sína menn til sigurs gegn Houston, 93-80.

Bosh var fremur ryðgaður í fyrri hálfleik og hitti aðeins úr einu skoti af sjö. Hann kláraði þó leikinn með 21 stig, tíu fráköst og fjögur farin skot.

Houston var með ellefu stiga forystu í hálfleik, 45-34, en náði aðeins að skora ellefu stig í þriðja leikhluta. Toronto náði yfirhöndinni í leiknum með 18-3 spretti og var það nóg til að tryggja liðinu sigur á endanum.

Anthony Parker skoraði níu af sínum ellefu stigum í þriðja leikhluta og Kris Humphries skoraði tíu af sextán stigum sínum í fjórða leikhluta.

Hjá Houston var Tracy McGrady stigahæstur með 23 stig. Yao Ming bætti við fimmtán, sex fráköstum auk þess sem hann varði þrjú skot.

Pit Riley vann sinn 1.200 sigur á ferlinum er Miami vann góðan sigur á LA Clippers á útivelli, 100-94. Dwayne Wade er allur að koma til eftir að hann byrjaði að spila eftir meiðslin sín og skoraði 35 stig í leiknum í nótt auk þess sem hann gaf tíu stoðsendingar.

Riley er þriðji þjálfarinn í sögu NBA sem nær þessum áfanga en hann hefur tapað 642 leikjum á ferlinum.

Portland vann Milwaukee í framlengdum leik, 117-113. Brandon Roy skoraði 26 stig í leiknum og LaMarcus Aldridge 24. Mo Williams var stigahæstur hjá Milwaukee með 33 stig.

Kobe Bryant skoraði 20 af sínum 28 stigum í síðari hálfleik er LA Lakers vann Golden State, 123-113. Þetta var þriðji sigur Lakers í röð. Andrew Bynum var með 20 stig og ellefu fráköst fyrir Lakers en hjá Golden State var Baron Davis stigahæstur með 20 stig.

Washington Wizards vann fimmtán stiga sigur á New Jersey, 104-89. Caron Butler ar með 28 stig fyrir Washington en Vince Carter 30 fyrir New Jersey. Jason Kidd var með þrefalda tvennu í leiknum - þrettán stig, þrettán stoðsendingar og tíu fráköst.

Þá vann Detroit sigur á Charlotte, 104-85, á heimavelli. Chauncey Billups var með 20 stig, Antonio McDyess nítján og Richard Hamilton átján.

Að síðustu vann New Orleans þriggja stiga sigur á Seattle, 91-88.