Grindavík heldur áfram að elta

Þrír leikir voru í Iceland Express deild karla í körfubolta í kvöld. Grindvíkingar halda áfram að fylgja toppliði KR en Grindavík vann Snæfell 93-81 á heimavelli sínum í kvöld.

Grindavík er tveimur stigum á eftir KR þegar níu umferðum er lokið. Arnar Freyr Jónsson var stigahæstur hjá Grindavík með 22 stig en Páll Axel Vilbergsson og Brenton Birmingham voru með 18 stig hvor. Sigurður Þorvaldsson skoraði 26 stig fyrir Snæfell.

Stjarnan tapaði fyrir Breiðabliki 87-91 í Garðabænum. Nemanja Sovic var óstöðvandi í liði Blika og skoraði hann 41 stig í kvöld. Með sigrinum náði Breiðablik að fjarlægast fallsætunum tveimur en Stjarnan situr í öðru þeirra.

Þá gerði ÍR góða ferð á Selfoss og vann sigur á FSu. Leikurinn endaði 71-75 en fyrir hann voru bæði liðin með 6 stig. Thomas Viglianco skoraði 22 stig fyrir FSu en Sveinbjörn Claessen var með 21 stig fyrir ÍR.