Alex Ferguson er ekki hissa á því að David Beckham skuli fara á lánssamningi til AC Milan yfir vetrarmánuðina á meðan að bandaríska MLS-deildin er í fríi.
Enn á eftir að ganga frá lánssamningnum en forráðamenn AC Milan eru þess fullvissir að hann muni ganga í gegn.
Beckham vill halda sér í formi á meðan að MLS-deildin er í fríi til að eiga möguleika á að spila með enska landsliðinu. Beckham lék lengi með Manchester United undir stjórn Ferguson.
„Þetta eru ekki óvænt tíðindi," sagði Ferguson. „Sá fótbolti sem Beckham er vanur er ekki spilaður í Bandaríkjunum. Það kemur ekki á óvart að hann vilji koma sér aftur í hefðbundnari fótbolta í Evrópu."
