Bailey: Engar skattgreiðslur á fjórum árum

Körfuknattleiksmaðurinn Damon Bailey segir að engin gögn séu að finna um að tekjuskattur hafi verið greiddur af launum hans á þeim rúmum fjórum árum sem hann lék körfubolta hér á landi.

Bailey var síðast samningsbundinn Grindavík í annað skiptið á ferlinum en þar að auki hefur hann leikið með Hamar/Selfossi, Þór í Þorlákshöfn og Njarðvík.

Hann hugðist sækja um íslenskan ríkisborgararétt um áramótin en hætti við þegar í ljós kom að engin gögn væru að finna um að tekjuskattur hafi verið greiddur af laununum hans.

„Þegar ég fór að vinna í umsókn minni um íslenskan ríkisborgararétt kom í ljós að ég þurfti að skila inn yfirliti um skattgreiðslur mínar undanfarin þrjú ár," sagði Bailey í samtali við Vísi. „Svo kom í ljós að ég er alls ekkert í skattakerfinu. Liðin hafa greinilega ekki verið að borga mína skatta og það er ég sem sit í súpunni. Það er greinilegt að ég hef verið ólöglegur á meðan veru minni stóð hér."

Hann hefur nú hætt við að sækja um ríkisborgararétt og hefur ákveðið að snúa aftur til síns heima í Bandaríkjunum þar sem honum stendur til boða starf. „Ég leitaði ráða hjá bandaríska sendiráðinu en starfsmenn þar gátu ekkert hjálpað mér. Þau ráðlögðu mér að ráða mér lögfræðing en það er einfaldlega of dýrt fyrir mig."

Vísir hefur undir höndum samninginn sem körfuknattleiksdeild Grindavíkur gerði við Bailey í apríl síðastliðnum. Þar kemur fram að þau laun sem hann fær greidd eru nettólaun eftir að skattar og gjöld hafa verið greidd.

Skattalögmaður sem Vísir ræddi við segir að ef íþróttamaður sem dvelur hér á landi í minnst 183 daga á ári beri hann fulla og ótakmarkaða skattskyldu af launum sínum samkvæmt íslenskum lögum. Launagreiðanda ber að standa skil á slíkri skattskyldu en eftir því sem næst verður komist fellur Bailey í þann flokk enda hefur hann dvalið hér á landi stærstan hluta síðustu fjögurra ára.

Taldi skattamál ábyrgð félaganna

Aðspurður um hvort hann hefði ekki sjálfur átt að fylgjast með því hvort að launagreiðendur hans hefðu staðið í skilum með skattgreiðslur segir hann að sem útlendingur hafi hann átt erfitt með það.

„Ég þekki ekki íslenskar reglur og lög. Ég hef alltaf heyrt að félögin eigi að sjá um að borga skattana. Ég taldi víst að fyrst ég væri starfsmaður hjá þessum félögum og að þau högnuðust á mínum starfskröftum myndu þau sjá um þessi mál. Ég taldi ekki að einstaklingurinn bæri ábyrgð á því hvað launagreiðandinn gerði."

„Að minnsta kosti 60 bandarískir leikmenn hafa spilað hér á landi síðan ég kom hingað. Þeir eru líklega fleiri en það. Ég lofa því að enginn þeirra hefur grennslast fyrir um skattgreiðslur þeirra hjá annað hvort félögunum sjálfum eða skattayfirvöldum. Ég hef sjálfur rætt við fjöldamarga leikmenn sem segja allir að félögin sjálf hafi séð um að greiða skattana þeirra, bæði á Íslandi sem og í Evrópu. Við vitum lítið um þessi mál en það er alveg ljóst að ég hef engan hag á því að svíkja undan skatti. Ég er ekki með neitt slæmt á minni samvisku."

Á þeim rúmum fjórum árum sem Bailey hefur dvalið hér á landi hefur hann leikið með fjórum félögum. Hann hafi ýmist fengið ávísun fyrir launum sínum eða upphæðin hafi verið millifærð á bankareikninginn hans. Hann hafi enn fremur aldrei fengið launaseðil eða yfirlit yfir launagreiðslur.

„Ég hef haft samband bæði við Hamar og Þór en engin svör fengið frá forráðamönnum félaganna um mín mál. Njarðvíkingar segjast fullvissir um að þau hafi gengið frá sínum málum og greitt bæði skatta og önnur gjöld af mínum launum. Ég veit hins vegar ekki af hverju það finnast þá engin gögn um það."

Hættur í körfuboltaÞegar efnahagskreppan skall á í haust sögðu langflest félagslið í Iceland Express deild karla upp samningum erlendra leikmanna sinna. Bailey var einn þeirra en ætlaði engu að síður að vera áfram hér á landi til þess að geta sótt um ríkisborgararétt.

„Mér stóð til boða að fara til liða víðs vegar í Evrópu, til að mynda í Þýskalandi, Frakklandi og Írlandi. En ég ákvað að vera áfram en nú hafa allar mínar áætlanir breyst."

„Ég ætlaði mér alltaf að búa á Íslandi. Mér hefur liðið afskaplega vel hér á landi og kynnst mörgu góðu fólki. Ég hef ekkert slæmt að segja um Ísland og ég er nánari mörgum hér en heima í Bandaríkjunum."

Bailey hefur ákveðið að hætta atvinnumennsku í körfubolta og mun nú snúa sér að kennslu og þjálfun í heimaborg sinni í Bandaríkjunum.

Ferill Damon Bailey á Íslandi

2004-5 Hamar/Selfoss

2005 Grindavík

2006-7 Þór, Þorlákshöfn

2007-8 Njarðvík

2008 Grindavík