Diego ekki á förum frá Werder Bremen

Forráðamenn Werder Bremen í Þýskalandi eru allt annað en sáttir við að fjölmiðlar hafa verið að orða miðjumanninn Diego við ítalska liðið Juventus. Þeir segja að Diego sé einfaldlega ekki til sölu.

Haft var eftir þessum 22 ára leikmanni í síðustu viku að hann hefði mikinn áhuga á að ganga til liðs við Juventus. Þýska félagið segir hinsvegar á heimasíðu sinni að orð leikmannsins hefðu verið tekin úr samhengi.

Diego skoraði mark Werder Bremen þegar liðið gerði 1-1 jafntefli við Bayern München í þýsku deildinni í gær.