Kobe Bryant: Ég vildi aldrei fara

Kobe Bryant hefur lýst því yfir að hann sé feginn að aldrei varð neitt úr því að hann færi frá LA Lakers eins og hann hótaði í sumar. Eftir að hafa verið miðlungslið undanfarin ár er Lakers-liðið nú orðið eitt það besta í NBA deildinni.

Lakers hefur verið á mikilli sigurgöngu undanfarið og það er ekki síst fyrir tilkomu Spánverjans Pau Gasol sem hefur styrkt liðið gríðarlega síðan hann kom til liðsins frá Memphis. Þá á Lakers liðið inni miðherjann Andrew Bynum sem hefur verið frá keppni síðustu vikur og ljóst er að ekkert lið vill mæta þeim gulu í úrslitakeppninni í vor.

Kobe Bryant fór fram á að verða skipt frá Lakers í sumar þegar honum þótti sýnt að Lakers-liðið yrði ekki meira en byssufóður fyrir bestu liðin í Vesturdeildinni.

"Ég var víst búinn að kaupa húsið hans Michael Jordan í Chicago og ég veit ekki hvað og hvað," sagði Bryant hlæjandi þegar hann var spurðu út í það hvort hann hefði í raun og veru viljað fara frá Lakers.

"Þetta fór allt vel. Ég vildi aldrei fara en á þeim tíma var erfitt að sjá fyrir sér bjarta framtíð. Ég er mjög feginn að ég fór ekki og þetta fór allt vel. Allir hlutir hafa sinn tilgang," sagði Bryant.