Þriðja lengsta sigurganga sögunnar hjá Houston

Lið Houston Rockets hélt áfram ótrúlegri sigurgöngu sinni í NBA deildinni í nótt. Liðið vann 19. leikinn í röð þegar það vann auðveldan sigur á New Jersey 91-73 á heimavelli og er þetta þriðja lengsta sigurganga allra tíma í NBA.

Tracy McGrady var stigahæstur í jöfnu liði Houston með 19 stig, en hann þurfti ekki að spila nema tæpa þrjá fjórðunga áður en hann fékk að hvíla sig og úrslit leiksins voru ráðin. Vince Carter skoraði mest hjá New Jersey, 13 stig.

Houston jafnaði í nótt árangur Lakers liðsins frá því um aldamótin yfir þriðju lengstu sigurgöngu allra tíma í NBA og vantar nú sigur gegn Atlanta á útivelli í næsta leik til að jafna næst lengstu sigurgöngu allra tíma, en það var 20 leikja sigurganga gullaldarliðs Milwaukee Bucks frá árinu 1970-70.

Liðið á þó enn langt í land með að ná ótrúlegu meti LA Lakers frá leiktíðinni 1971-72 þegar það lið vann hvorki meira né minna en 33 leiki í röð.

Cleveland lagði Portland 88-80 á heimavelli með góðum endaspretti. LeBron James náði enn einni þrennunni í vetur þegar hann skoraði 24 stig, hirti 10 fráköst og gaf 11 stoðsendingar fyrir Cleveland, en LaMarcus Aldridge skoraði 25 stig fyrir Portland.

Orlando lagði Atlanta 123-112. Dwight Howard skoraði 26 stig og hirti 16 fráköst fyrir Orlando og Tyrkinn Hedo Turkoglu náði þrefaldri tvennu með 23 stigum, 13 stoðsendingum og 10 fráköstum. Joe Johnson skoraði 20 af 27 stigum sínum í fyrri hálfleik fyrir Atlanta.

Boston varð í nótt fyrsta liðið í NBA í vetur til að vinna 50 leiki þegar það skellti Philadelphia örugglega á útivelli 100-86. Kevin Garnett var góður í liði Boston og skoraði 26 stig og hirti 12 fráköst, en Andre Miller skoraði 22 stig fyrir Philadelphia sem hafði verið á góðri rispu fyrir leikinn. Sam Cassell lék í nótt sinn fyrsta leik fyrir Boston eftir að hann gekk í raðir liðsins frá LA Clippers, en náði sér aldrei á strik.

Miami tapaði enn einum leiknum þegar liðið lá heima fyrir LA Clippers 99-98. Cuttino Mobley skoraði 29 stig fyrir Clippers en Ricky Davis var með 27 stig hjá Miami.

Dallas burstaði New York á heimavelli 108-79. Dirk Nowitzki og Jason Terry skoruðu 18 stig hvor í jöfnu liði Dallas en Zach Randolph skoraði 21 stig og hirti 14 fráköst fyrir New York.

Loks hefndi San Antonio fyrir tap gegn Denver um helgina með því að vinna sigur í öðrum leik liðanna á nokkrum dögum á heimavelli í nótt 107-103. Tim Duncan var óstöðvandi hjá San Antonio með 23 stig og 18 fráköst og Manu Ginobili gaf 14 stoðsendingar. Allen Iverson skoraði 28 stig fyrir Denver.

Staðan í NBA