Eiður: Erum að fara í erfiðan leik

„Þó að Makedónía sé ekki mest spennandi landsliðið út á við og ekki með mikið af þekktum nöfnum þá er þetta mjög gott lið," sagði Eiður Smári Guðjohnsen í fréttum Stöðvar 2 í kvöld.

Ísland tekur á móti Makedóníu í undankeppni heimsmeistaramótsins á Laugardalsvelli á miðvikudagskvöld.

„Það má alls ekki ganga út frá því að við séum að fara í auðveldan leik. Miðað við það sem maður hefur heyrt þá er Makedónía bara eitt sterkasta lið riðilsins," sagði Eiður.

„Það er alltaf ætlunin hjá okkur að ná í þrjú stig. Miðað við að við séum að spila á heimavelli þá verðum við að koma þeirri hugsun í okkur að við eigum að vinna leikina sem við spilum á heimavelli."