Auður Evrópu orðinn meiri en Bandaríkjanna

Bandaríkin eru ekki lengur heimili mesta auðs í heiminum. Evrópa hefur velt Bandaríkjamönnum úr sessi hvað þetta varðar. Auðæfi Bandaríkjanna hafa minnkað mest af öllum landsvæðum heimsins nú ári eftir fall Lehman Brothers.

Samkvæmt skýrslu frá The Boston Consulting Group minnkuðu auðæfi heimsins um tæp 12% á síðasta ári niður í rúmlega 92 trilljónir dollara.

Hinsvegar minnkuðu auðæfi Bandaríkjanna mest af öllum þjóðum eða um tæp 22%. Til samaburðar má nefna að auðæfi Evrópu minnkuðu um 5,8% og voru tæplega 33 trilljónir dollara eða yfir þriðjungur af öllum auðæfum í heiminum.

Þetta er í fyrsta sinn síðan 2001 að auðæfi heimsins minnka milli ára. Aðeins einn heimshluti jók auðæfi sín á árinu eða Suður-Ameríka um 3%.

Tala þeirra heimili þar sem milljónamæringar í dollurum búa fækkaði um tæp 18% á heimsvísu og voru í lok ársins um 9 milljón talsins. Heimilum með tekjur yfir 5 milljónir dollara fækkaði hinsvegar um 21,5%.

Peter Damisch einn af höfundum skýrslunnar segir að auðæfin byrji ekki að aukast að nýju fyrr en á næsta ári. Það verði svo ekki fyrr en árið 2013 að þau ná aftur sömu stöðu og þau voru í árið 2007.