Grindvíkingar sýna beint frá leik sínum við Stjörnuna í kvöld

Grindvíkingar taka á móti Stjörnunni í stórleik kvöldsins í Iceland Express deild karla í Röstinni í Grindavík í kvöld og það má fylgjast með gangi mála á umfg.is Körfuknattleiksdeild Grindavíkur er nú farin að sýna beint frá heimaleikjum liðsins og fylgir þar með í fótspor KR, KFÍ, Fjölnis og fleiri liða.

Í gær sýndu Grindvíkingar beint frá leik Grindavíkur og Njarðvíkur í Iceland Express deild kvenna og gekk útsendingin vel. Í kvöld verður svo sýnt beint frá Grindavík - Stjarnan í Iceland Express deild karla. Þeir sem komast ekki til Grindavíkur á leikinn í kvöld geta því fylgst með í beinni á www.umfg.is.

Stjarnan er fyrir ofan Grindavík í töflunni en liðið tapaði sínum fyrsta leik á tímabilinu á móti Tindastól í síðustu umferð. Grindavík vann sigur á Blikum í síðasta leik en hafði þar á undan tapað þremur leikjum í röð þar af tveimur þeirra á heimavelli.