Breska fjármálaráðuneytið (FSA) segir að hrun íslensku bankanna hafi leitt í ljós að núverandi bankalöggjöf Evrópusambandsins sé ekki á vetur setjandi.
Kerfi sem býður upp á að bankar utan Bretlands geti tekið við innlánum í landinu án þess að setja upp tryggingar fyrir þessum innlánum gangi ekki upp.
Kröfur FSA um breytingar á bankalöggjöf ESB koma í kjölfar einhverrar verstu fjármálakreppu sem Bretland hefur upplifað, Samkvæmt frétt um málið á Bloomberg fréttaveitunni vinnur FSA nú ásamt alþjóðlegum aðilum að því að endurhanna bankalöggjöfina.
Forstjóri FSA, Adair Turner, segir að annaðhvort þurfi þeir "meiri Evrópu eða minni Evrópu" og slíkt þurfi að ræða og semja um.
Í árlegri skýrslu FSA um áhættumat kemur fram að breski bankageirinn sé viðkvæmur fyrir áframhaldandi áföllum og að bankar landsins þurfi að einbeita sér að því að lifa af til lengri tíma í stað þess að sækjast eftir skammtímagróða.
Turner boðar jafnframt að bindiskylda bankanna verði aukin í samráði við alþjóðlegar stofnanir og að þær breytingar verði komnar í gagnið á næsta ári.
