Nokkrir til­búnir að greiða Trump fyrir inn­herja­upp­lýsingar

Félag sem er í meirihlutaeigu Trump-fjölskyldunnar og rekur samfélagsmiðilinn Truth Social byrjaði að selja aðgang að nýrri þjónustu sem það kallar Truth API um mánaðamótin. Hún veitir fjárfestum á Wall Street aðgang að færslum á samfélagsmiðli forsetans á undan öðrum.

Áskriftin að þjónustunni er sögð kosta á bilinu 60.000 til 100.000 dollara, jafnvirði allt að rúmlega tólf milljóna íslenskra króna, á mánuði, að því er segir í frétt breska ríkisútvarpsins.

Notendafjöldi og dagleg umferð um Truth Social er aðeins brot af því sem gerist X, allsherjarforritinu, sem samfélagsmiðill Trump eftir eftirlíking af. X sjálft kemst þó ekki á lista yfir tíu mest notuðu samfélagmiða heims.

Trump sjálfur er þannig langstærsta aðdráttarafl Truth Social en þar birtir hann iðulega yfirlýsingar og tilkynningar sem hafa margar mikil áhrif á fjármálamarkaði á milli þess sem hann dreifir furðulegum gervigreindarmyndum og myndböndum af sér og óvinum sínum.

Færslur Trump á Truth Social um átökin við Íran sem hófust í vetur hafa til dæmis ítrekað hreyft við olíuverði og hlutabréfamörkuðum.

Gæti gerst sekur um innherjasvik

Framtak samfélagsmiðlafyrirtækis Trump hefur af þessum sökum sætt harðri gagnrýni. Það sé í besta falli ósiðlegt og í versta falli kolólöglegt. Með þjónustunni hagnist forsetinn beint á því að selja fyrirtækjum forgang að hans eigin opinberu yfirlýsingum sem veiti þeim forskot á aðra fjárfesta þegar þessar yfirlýsingar hrista upp í mörkuðum.

Richard Painter, aðalráðgjafi George W. Bush, fyrrverandi forseta, í siðamálum, sagði breska ríkisútvarpinu nýlega að Trump gæti gerst sekur um innherjasvik með sölunni á forgangi að samfélagsmiðlafærslunum.

„Ef ég bý yfir upplýsingum sem tilheyra Bandaríkjastjórn sem ég má ekki nota til þess að stunda viðskipti en ég gef öðrum upplýsingarnar sem greiða mér fyrir þær og þeir stunda viðskipti og ég veit að þeir eru líklegir til þess að stunda viðskipti þá er ég líka sekur um innherjasvik og þeir líka,“ sagði Painter.

Innherjalögin næðu þó aðeins til ákveðinna færslna forsetans, þar á meðal um tolla, stríðsrekstur og aðrar stjórnarathafnir.

Gekk Painter svo langt að segja að forstjóri Verðbréfaeftirlits Bandaríkjanna (SEC) ætti að hóta því að segja af sér ef Truth Social félli ekki frá áformunum eða undanskildi færslur forsetans um stjórnarathafnir frá þjónustunni.

Veðjað grimmt rétt fyrir færslur Trump

Ítrekað hefur verið braskað og brallað rétt fyrir tilkynningar Trump á Truth Social á undanförnum mánuðum. Svo rammt kvað að þessu að Hvíta húsið sendi starfsmönnum sínum tölvupóst í vor þar sem þeir voru varaðir við því að nýta sér innherjaupplýsingar til þess að leggja fé undir á veðmálasíðum.

Bandarískur hermaður var handtekinn í apríl vegna gruns um að hann hefði nýtt sér innherjaupplýsingar til þess að veðja á að Bandaríkjastjórn tæki Nicolás Maduro, forseta Maduro, höndum í janúar. Hann vann jafnvirði tuga milljóna króna á veðmálasíðunni Polymarket.

Mikill taprekstur vegna niðursveiflu í rafmyntum

Truth Media and Technology, eigandi Truth Social, greindi frá 238 milljóna dollara tapi, jafnvirði hátt í 29,5 milljarða íslenskra króna, á öðrum ársfjórðungi í gær. Það var tífalt meira tap en í fyrra.

Stór hluti tapsins skýrist af verðfalli á rafmyntunum Bitcoin og Cronos. Félag forsetafjölskyldunnar segist nú ætla að einbeita sér frekar að samfélagsmiðlarekstrinum og síður að rafmyntabraski og samstarfi við veðmálafyrirtæki.