Ólíklegt að Adriano komi aftur til Ítalíu

Umboðsmaður Brasilíumannsins Adriano segir það ólíklegt að leikmaðurinn muni brátt snúa aftur til Ítalíu þar sem hann er samningsbundinn Inter. Umboðsmaðurinn, Gilmar Rinaldi, sagði þetta í samtali við Gazzetta dello Sport.

Adriano hefur lengi átt við áfengisvanda og þunglyndi að stríða og tilkynnti á dögunum að hann ætlaði að taka sér frí frá fótbolta.

Hann er 27 ára gamall en sagðist hafa misst löngunina fyrir að spila knattspyrnu.

Marrimo Moratti, forseti Inter, sagði á miðvikudaginn að hann væri að íhuga að rifta samningi Adriano en hann rennur út í lok næstu leiktíðar.

Þá hefur hann verið orðaður við AC Milan en Adriano Galliani, framkvæmdarstjóri félagsins, gerði lítið úr þeim sögusögnum.