NBA í nótt: Aftur vann Lakers í framlengingu

LA Lakers vann í nótt sinn annan leik í röð í framlengingu - í þetta sinn gegn Houston Rockets, 103-102.

Kobe Bryant var stigahæstur hjá Lakers með 41 stig og Andrew Bynum var með sautján stig og sautján fráköst. Carl Landry var stigahæstur hjá Houston með 20 stig, Luis Scola var með sextán stig og þrettán fráköst.

Ron Artest og Trevor Ariza voru báðir að mæta sínum gömlu félögum en Artest fór frá Houston til Lakers í sumar og Ariza frá Lakers til Houston.

Báðir settu niður þrista á lokamínútu fjórða leikhluta. Fyrst Artest og kom hann þá Lakers yfir, 92-89, þegar 30 sekúndur voru til leiksloka. Svo Ariza þegar fimmtán sekúndur voru eftir.

Ariza fékk svo tækifæri til að tryggja Houston sigurinn í framlengingunni en Derek Fisher kom í veg fyrir það.

Toronto vann Detroit, 110-99. Andrea Bargnani skoraði 22 stig fyrir Toronto og tók tólf fráköst þar að auki. Chris Bosh var stigahæstur með 25 stig.

Orlando vann Phoenix, 122-100. Ryan Anderson var með 20 stig og tíu fráköst fyrir Orlando og Dwight Howard var með 25 stig. Þetta var fyrsti tapleikur Phoenix í haust.

Denver vann New Jersey, 122-94. Chauncey Billups og Carmelo Anthony fóru fyrir Denver í þriðja leikhluta er liðið skoraði 44 stig og tryggði sér þar með sigurinn. Þetta er besta byrjun Denver í deildinni í 24 ár en liðið er enn taplaust eftir fimm leiki.

Miami vann Washington, 93-89. Dwyane Wade skoraði 40 stig í leiknum, þar á meðal sigurkörfuna þegar 25 sekúndur voru til leiksloka.

Indiana vann New York, 101-89. TJ Ford skoraði sextán stig í leiknum, þar af átta á síðustu þremur mínútum leiksins. Þetta var fyrsti sigur Indiana á tímabilinu.

Boston vann Minnesota, 92-90. Þetta var fyrsti leikur Kevin Garnett með Boston í Minnesota síðan hann fór til Boston árið 2007. Hann skoraði tólf stig og tók ellefu fráköst. Boston er enn taplaust á leiktíðinni.

Atlanta vann Sacramento, 113-105. Joe Johnson og Jamal Crawford skoruðu 26 stig hvor fyrir Atlanta.

New Orleans vann Dallas, 114-107, í framlengdum leik. Peja Stojakovic náði að tryggja New Orleans framlengingu með þristi á lokasekúndum fjórða leikhluta. Chris Paul skoraði 39 stig í leiknum, þar af sex í framlengingu.

Golden State vann Memphis, 113-105. Monta Ellis var með 24 stig og tólf stoðsendingar. Anthony Morrow var einnig með 24 stig og Corey Maggette 20. Þetta var fyrsti sigur Golden State á tímabilinu.