Hlynur: Okkur verður slátrað með svona spilamennsku

"Það verður vonandi annar bragur á okkur í næsta leik. Ég vona að þetta sé það sem við þurftum til að vakna. Ef við spilum aftur svona á miðvikudaginn, þá slátra þeir okkur," sagði Hlynur Bæringsson, spilandi þjálfari Snæfells, eftir að lið hans var kjöldregið 110-82 í Grindavík í kvöld.

"Þetta Grindavíkurlið er með fullt af góðum skyttum og með fullri virðingu fyrir Páli Axeli, þá skipti bara ekki máli að hann hafi ekki verið með. Það er oft þannig í liðum að margir vilja skora, en mér sýndust allir vera sáttir við sitt hlutverk í þessu liði og við getum ekki hugsað okkur að þetta verði eitthvað létt þó Palli sé ekki með," sagði Hlynur í samtali við Vísi.