Hafnaboltastjarnan Manny Ramirez hefur verið dæmdur í 50 leikja bann fyrir að nota ólögleg lyf. Hann er enn einn hafnaboltaleikmaðurinn sem fellur á lyfjaprófi.
Þetta langa bann mun kosta Ramirez 5 milljónir punda sem er 31 prósent af launum hans.
Ramirez var með svör á reiðum höndum eftir að hann féll á prófinu.
„Læknir gaf mér lyf, ekki stera, sem hann hélt að væru í lagi en því miður þá var það á bannlista," sagði Ramirez.
„Mistökin eru samt á mína ábyrgð. Mér hefur verið ráðlagt að tjá mig ekki frekar."
Það er leikið afar þétt í hafnaboltanum í Bandaríkjunum og Ramirez verður mættur aftur á völlinn þann 3. júlí.
