Jón Arnór: Þetta er rétt að byrja

"Þetta var flottur leikur hjá okkur, sérstaklega varnarleikurinn," sagði Jón Arnór Stefánsson hjá KR eftir að hans menn tóku Keflavík í kennslustund 102-74 í fyrsta leik liðanna í undanúrslitum Iceland Express deildarinnar í kvöld.

"Við náðum að loka vel á Jesse Rosa og ég held að hann hafi verið með slaka skotnýtingu þó hann sé að skora dálítið. Það var mikilvægt að halda þeim undir 80 stigum hérna heima," sagði Jón Arnór í samtali við Vísi.

Næsti leikur liðanna fer fram í Keflavík á þriðjudagskvöldið þar sem væntanlega verður hart barist.

"Næsti leikur verður hörkurimma. Ég hugsa að verði harðari barátta og jafnvel enn meiri stemming, enda verður spennan þá orðin enn meiri í einvíginu," sagði Jón Arnór.