Don King: Khan hefur vakið sofandi risa

Hinn umdeildi hnefaleikafrömuður, Don King, segist vera mikill aðdáandi Bretans Amir Khan en gerir þó ekki ráð fyrir því að hann muni eiga mikið í Marco Antonio Barrera á laugardag.

„Það kæmi verulega á óvart ef Khan myndi vinna. Ég elska strákinn enda verulega frambærilegur ungur maður. Þegar ég sá hann fyrst líkti ég honum við ungan Sugar Ray Robinson," sagði Don King á blaðamannafundi í dag.

„Khan er aftur á móti búinn að vekja sofandi risa. Þegar maður vekur sofandi risa í Afríku þá getur hvað sem er gerst enda mun fíll traðka á öllu sem hann sér. Þetta er risabardagi fyrir Barrera. Hann verður að vinna þennan bardaga. Það er að duga eða drepast fyrir hann enda er hann að keppa fyrir fólkið í Mexíkó."