Lakers endurheimti Gasol og náði góðri hefnd gegn Clippers

Kobe Bryant skoraði 30 stig í 40 stiga sigri Los Angeles Lakers á nágrönnum sínum í Los Angeles Clippers, 126-86, í NBA-deildinni í nótt. Clippers vann leik liðanna í dögunum en Lakers hefndi með því að vinna stærsta sigur sinn á Clippers síðan í litla liðið í Los Angeles flutti í Staples Center 1994.

Pau Gasol kom til baka eftir sex leikja fjarveru vegna meiðsla og var með 20 stig og 6 fráköst og þá var Andrew Bynum með 20 stig og 7 fráköst. Eric Gordon og Craig Smith skoruðu 17 stig fyrir Clippers.

Dirk Nowitzki skoraði 33 stig og Jason Terry var með 21 stig þegar Dallas Mavericks vann 99-98 sigur á Oklahoma City Thunder en þeir skoruðu saman 16 af síðustu 18 stigum Dallas. Kevin Durant var með 30 stig og 13 fráköst fyrir Thunder.

Derrick Rose setti nýtt persónulegt stigamet með því að skora 37 stig í 121-119 sigri Chicago Bulls á Washington Wizards eftir framlengingu. Antawn Jamison var með 34 stig og 18 fráköst hjá Washington.

Jamal Crawford tryggði Atlanta Hawks 102-101 sigur á Phoenix Suns með þriggja stiga körfu um leið og leiktíminn rann út. Al Horford var með 24 stig fyrir Atlanta og Josh Smith bætti við 20 stigum og 15 fráköstum. Amar'e Stoudemire var með 28 stig og 14 fráköst fyrir Phoenix.

Richard Hamilton og félagar í Detroit Pistons unnu sinn annan leik í röð þegar liðið vann 110-104 sigur á New Orleans Hornets í framlengingu. Detroit hafði tapað 13 leikjum í röð þar á undan. Richard Hamilton skoraði 32 stig og Ben Wallace tók 21 frákast. Chris Paul var með 24 stig og 14 stoðsendingar hjá New Orleans.

Dwyane Wade átti stórleik og skoraði 37 stig þegar Miami Heat vann 115-106 sigur á Houston Rockets.

Portland Trailblazers vann 102-87 sigur á Orlando Magic þrátt fyrir að leika án Brandon Roy.

Brandon Jennings var með 25 stig í 113-104 sigri Milwaukee Bucks á Golden State Warriors.

Andrea Bargnani var með 24 stig og 12 fráköst í 112-104 sigri Toronto Raptors á New York Knicks.

Boris Diaw skoraði 26 stig og tók 11 fráköst í 92-76 sigri Charlotte Bobcats á San Antonio Spurs.

Sam Dalembert var með 17 stig og 12 fráköst í 98-86 sigri Philadelphia 76ers á Sacramento Kings.

Danny Granger skoraði 22 af 28 stigum sínum í 72 stiga fyrri hálfleik þegar Indiana Pacers vann 121-105 sigur á New Jersey Nets.

Rudy Gay (21 stig), Zach Randolph (20) og O.J. Mayo (20) brutu allir 20 stiga múrinn í 135-110 sigri Memphis Grizzlies á Minnesota Timberwolves.