Tilkynnir ákvörðun sína í klukkutíma sjónvarpsþætti

LeBron James mun binda endi á fjölmiðlasirkus ársins annað kvöld þegar hann tilkynnir í klukkutímaþætti á ESPN með hvaða félagi hann hyggst leika næsta vetur.

Fjölmiðlar eru ekki enn búnir að finna út hvað James ætlar sér að gera. Flestir búast þó við því að hann muni halda áfram að spila með Cleveland.

Sérstaklega í ljósi þess að James hefur verið duglegur við að vernda ímynd sína og það þykir ekki góður leikur í Bandaríkjunum að kveðja heimalið sitt í klukkutíma sjónvarpsþætti.

Ef hann færi þá leið er talið að hann myndi vekja reiði margra almennra íþróttaáhugamanna. Ekki bara þeirra sem styðja Cleveland.

Einhverjir telja þó að James muni fara til Chicago og að Carlos Boozer fari þangað með honum. Þar er fyrir hinn magnaði Derrick Rose.

Svo má ekki enn útiloka möguleikann að hann fari til Miami með Dwyane Wade og Chris Bosh. Það er líklega auðveldasta leiðin til þess að eignast meistarahring.