Um 700 manns þurfa að yfirgefa heimili sín

Tekin hefur verið ákvörðun um rýmingu í Fljótshlíð og í Landeyjum þar sem eldgos virðist hafið í Eyjafjallajökli. Víðir Sigurðsson hjá Almannavörnum segir að verið sé að koma skilaboðum til fólks á svæðinu. Um 700 manns eru búsettir á svæðinu sem rýma skal en um sömu áætlun er að ræða og virkjuð var þegar gaus á Fimmvörðuhálsi.

Fólk er minnt á að taka með helstu nauðsynjar og koma sér að fjöldahjálparstöðvum á Heimalandi, í Varmahlíð og í Drangshlíð.

Áður höfðu bæir verið rýmdir undir jökli og vegurinn frá Hvolsvelli að Skógum er lokaður.