Aðstoðin við Grikkland talin of lítil og of sein

Fjallað er um málið í Morgunkorni greiningar Íslandsbanka. Þar segir að vonir standa til þess að sendinefnd Alþjóðagjaldeyrissjóðsins (AGS) komist til Grikklands í dag til að funda með þarlendum yfirvöldum. Sendinefndin hefur líkt og svo margir aðrir þurft að láta í minni pokann gagnvart Eyjafjallajökli undanfarna daga.

Þar til sendinefndin kemst til Aþenu geta samningaviðræður um aðgerðaáætlun ekki hafist og þau tíðindi fóru illa í markaði í gær, enda hafa áhyggjur af stöðu Grikklands farið stigvaxandi síðustu daga. Þessar vaxandi áhyggjur hafa sést á öllum skjálftamælum markaða.

Ávöxtunarkrafa grískra ríkisskuldabréfa til 10 ára stendur í 7,6% og hefur aldrei verið hærri. Til samanburðar er krafa sambærilegra þýskra ríkisskuldabréfa nú 3,1%. Þá er skuldatryggingaálag Grikklands einnig í hámarki og stóð í 470 punktum í gær. Grísk hlutabréf hafa einnig lækkað í verði og evran hefur verið undir þrýstingi og gaf hún lítillega eftir gagnvart Bandaríkjadollar í gær.

Málefni Grikklands hafa eins og kunnugt er verið mjög ráðandi í Evru/dollar gengiskrossinum það sem af er þessu ári og hefur evran síðan um áramót veikst um 10% gagnvart Bandaríkjadollar.

Vaxandi fjármögnunarkostnaður Grikklands varð til þess að neyðarfundur var kallaður saman meðal fjármálaráðherra Evruríkjanna sem síðan ákváðu í samstarfi við AGS að leggja til aðgerðapakka til handa Grikklandi upp á 45 milljarða evra þar sem EU mun leggja fram 30 milljarða og AGS 15 milljarða evra.

Aðgerðapakkinn á að hjálpa Grikklandi að komast fram hjá stórum gjalddögum í maí og júní og koma í veg fyrir greiðslufall. Margir óttast þó að aðgerðapakkinn sé of lítið of seint en ljóst er að staða Grikklands er orðin grafalvarleg. Skuldastaða Grikklands er nú orðin óviðunandi en fjárlagahalli síðasta árs nam 12,7% af landsframleiðslu.